TBA KUSAIDIA UJENZI NA UKARABATI WA OFISI NA MADARASA SHULE YA SEKONDARI JUHUDI.

Imewekwa: Friday 28, February 2020

Wakala wa Majengo Tanzania (TBA), umeahidi kusaidia Ujenzi na Ukarabati wa Majengo katika Shule ya Sekondari Juhudi iliyopo eneo la Gongo la Mboto, Ilala Jijini Dar es Salaam. Shule hiyo iliyoanzishwa na kuendelezwa na wananchi wa eneo hilo, inakabiliwa na uchakavu wa miundo mbinu ya majengo kama ofisi na madarasa, hivyo kuwafanya wanafunzi na walimu kusoma na kufanya kazi katika mazingira magumu.

Akizungumza katika Mahafali ya Tatu ya Kidato cha Sita baada ya kusikiliza Risala iliyosomwa na Mkuu wa Shule pamoja na Risala iliyosomwa na viongozi wa Serikali ya Wanafunzi, Kaimu Mtendaji Mkuu wa TBA Bw. Said Mndeme aliyekuwa Mgeni Rasmi katika Mahafali hayo alisema, “TBA kama mdau wa sekta ya elimu upande wa miundo mbinu ya majengo na majenzi tutakarabati majengo ya Utawala na Ofisi za walimu pamoja na Madarasa 10 ya wanafunzi”. Pia aliahidi kujenga Ofisi kwa ajili ya serikali ya wanafunzi ambao wanafanya kazi bila kuwa na ofisi kwa sasa.

Shughuli ya Ukarabati imeshaanza kwa hatua za awali kwani mgeni rasmi aliambatana na jopo la wataalamu kutoka TBA ambao kabla ya kuanza kwa mahafali walitembelea na kuanza kufanya tathmini ya majengo yanayohitaji ukarabati.

Shule ya Sekondari Juhudi inaibua na kuendeleza vipaji vya wanafunzi katika Sekta ya Michezo lakini inakabiliwa na changamoto ya kukosa viwanja na miundo mbinu mingine ya michezo. Katika sherehe hizo za mahafali Mgeni Rasmi aliahidi kulifikisha suala hilo kwa wadau mbalimbali wa michezo ili walishughulikie.