TBA fikirieni Mikakati mipya yenye ubunifu- Dkt. Mahenge

Imewekwa: Thursday 30, January 2020

Wafanyakazi wa Wakala wa Majengo Tanzania (TBA), wametakiwa kubuni Mikakati mipya yenye ubunifu (innovation) ambayo itawawezesha kutekeleza kwa ufanisi malengo yao. Wito huo umetolewa na Mkuu wa Mkoa wa Dodoma Dkt. Binirith Satano Mahenge katika Hotuba yake iliyosomwa kwa niaba yake na Mkuu wa Wilaya ya Kongwa Deogratias Ndejembi wakati wa ufunguzi wa Mkutano wa Baraza la Wafanyakazi wa TBA unaofanyika Dodoma.

“TBA mmepewa dhamana kubwa ya kutekeleza miradi mikubwa na nyeti yenye sura ya kitaifa na ambayo ina mchango mkubwa katika ujenzi wa Taifa letu, hivyo mnatakiwa kufanya kazi kwa kujituma badala ya mazoea ili kufikia malengo”

Aidha Dkt. Mahenge amewataka wafanyakazi hao kutumia Baraza hilo kutazama kwa undani hatua ambazo TBA imepiga na kujadili maeneo ambayo malengo ya TBA hayajafikiwa kwa lengo la kuboresha zaidi na kufikia malengo yaliyokusudiwa na Wakala.

Awali akizungumza katika Mkutano huo Mtendaji Mkuu wa TBA Arch. Daudi Kondoro amesema TBA imeendelea kutekeleza miradi ya Washitiri ambayo imegawanyika katika makundi manne (4); Miradi ya Ushauri, Miradi ya Ujenzi, Miradi ya usanifu na ujenzi na Miradi ya Usimamizi. Hadi kufikia Desemba, 2019, TBA imetekeleza jumla ya miradi 169.

Baadhi ya Miradi hiyo ni pamoja na Ujenzi wa Radar katika viwanja vya ndege vya DSM, Songwe, KIA na Mwanza, Ujenzi wa Hospitali ya Rufaa ya Mkoa wa Geita, Ujenzi wa jengo la Maabara, jengo la upasuaji na mionzi na jengo la wagonjwa wa nje kwenye Hospitali ya Rufaa ya Mkoa wa Simiyu. Miradi mingine ni Ujenzi wa Vihenge vya kuhifadhia nafaka katika Mikoa ya Ruvuma, Njombe, Rukwa, Katavi, Manyara, Dodoma na Shinyanga pamoja na Mradi wa Ujenzi wa kituo cha pamoja cha Forodha Kasumulu-Mbeya.

Mkutano wa Baraza la Wafanyakazi Wakala wa Majengo Tanzania hufanyika mara 2 kwa Mwaka kwa lengo la kujadili maendeleo ya Wakala.