WANAWAKE TBA WASHIRIKI MAADHIMISHO YA SIKU YA WANAWAKE DUNIANI

Imewekwa: Monday 09, March 2020

Wanawake wa Wakala wa Majengo Tanzania (TBA) walipata fursa ya kushiriki maadhimisho ya siku ya wanawake duniani Machi 8, 2020 katika maeneo mbalimbali nchini yenye kauli mbiu “Kizazi cha Usawa kwa Maendeleo ya Tanzania ya sasa na baadaye”. Pia walipata nafasi ya kutembelea Hospitali ya Amana jijini Dar es Salaam na kutembelea Kituo cha watoto yatima cha TCRC kilichopo Nyansaka jijini Mwanza.

Katika Mkoa wa Dar es Salaam kongamano la maadhimisho ya siku ya wanawake lilifanyika katika viwanja vya Leaders, Kinondoni ambapo Mkuu wa Mkoa wa Dar es Salaam Mhe. Paul Makonda alikuwa mgeni rasmi. Katika hotuba yake, Mkuu wa Mkoa alisema hataki kumwona mwanamke yeyote katika mkoa anaouongoza akinyanyasika, ndio maana aliamua kuwasaidia wanawake waliotelekezwa na wenza wao na kutoa namba za mawasiliano ambayo wanaweza kupiga bure.

Aidha, katika Mkoa wa Mwanza wanawake wa TBA walishiriki maadhimisho siku ya wanawake duniani katika viwanja vya Furahisha ambapo Mgeni rasmi alikuwa Mkuu wa Wilaya ya Nyamagama Mhe. Dkt. Philis M. Nyimbi ambaye alisisitiza umuhimu wa wanawake kupewa mikopo, kupewa kipaumbele katika nyanja mbalimbali pamoja na kuthubutu kushiriki katika vinyang’anyiro vya kugombea nafasi mbalimbali za Uongozi bila kusubiri upendeleo wa viti maalum.

Katika kuadhimisha siku ya wanawake duniani, wanawake wa TBA walipata nafasi ya kutembelea Hospitali ya Amana jijini Dar es Salaam na kutoa vifaa tiba pamoja na mashuka kwa mama wajawazito. Vile vile Mkoani Mwanza wanawake wa TBA walitembelea kituo cha watoto yatima cha TCRC kilichopo Nyansaka na kutoa mahitaji mbalimbali yakiwemo mahindi gunia 3, sukari kilo 25, sabuni ya unga, mchele kilo 100, taulo za kike pamoja na mahitaji mengine ya msingi.