Arch. Kondoro aidhinishwa rasmi kuwa Mtendaji Mkuu TBA

Imewekwa: Wednesday 23, October 2019

Wakala wa Majengo Tanzania (TBA), umepata Mtendaji Mkuu mpya Arch. Daud W. Kondoro ambaye ameidhinishwa rasmi kuiongoza Taasisi hii akichukua nafasi ya aliyekuwa Mtendaji wake Mkuu, Arch. Elius A. Mwakalinga ambaye aliteuliwa kuwa Katibu Mkuu Wizara ya Ujenzi, Uchukuzi na Mawasiliano (Sekta ya Ujenzi).

Kabla ya kuidhinishwa rasmi, Arch. Kondoro alikuwa anakaimu nafasi hiyo kwa kipindi chote ambacho Arch. Mwakalinga ameteuliwa kuwa Katibu Mkuu.

Akiwasilisha taarifa za udhibitisho/uteuzi huo kutoka kwa Waziri wa Ujenzi, Uchukuzi na Mawasiliano Mhandisi Isaack Kamwelwe, Katibu Mkuu Mwakalinga amesema Waziri ameridhika na utendaji kazi wa TBA hivyo amemthibitisha rasmi Arch. Daud W. Kondoro kuwa Mtendaji Mkuu wa TBA.

Aidha, Katibu Mkuu Mwakalinga, ameishukuru TBA kwa kazi inayoendelea kufanya kwa kuzingatia viwango vya ubora, gharama nafuu na muda wa utekelezaji. Alipongeza kazi inayofanyika katika miradi mbalimbali mikoani huku akitaja baadhi ya miradi mikubwa kama vile nyumba za makazi Magomeni Kota na Mji wa Serikali Chamwino.

Naye Mtendaji Mkuu mpya Arch. Kondoro, ameshukuru Mamlaka ya Uteuzi kwa kuwa na imani naye na kuahidi kutekeleza majukumu aliyopewa kwa weledi na kwa uwezo wake wote. Pia ameishukuru menejimenti na wafanyakazi wote wa TBA kwa ushirikiano waliompa kwa kipindi chote alichokuwa anakaimu nafasi hiyo, na kuomba ushirikiano huo uendelee ili kutekeleza malengo ya Taasisi kwa weledi na mafanikio zaidi.

Arch. Daud W. Kondoro anakuwa Mtendaji Mkuu wa tatu kushika wadhifa huo tangu TBA ilipoanzishwa mwaka 2002.