TBA kukamilisha Mradi wa Magomeni Kota

Imewekwa: Wednesday 17, April 2019

Wakala wa Majengo Tanzania (TBA), imenunua Mitambo ya kuchakata zege pamoja na Mashine za kutengeneza tofali ambazo zitatumika kupunguza gharama za ujenzi katika miradi mbalimbali inayotekelezwa na TBA ukiwemo Mradi wa nyumba za makazi Magomeni Kota.

Hayo yamesemwa na Mhandisi Mkuu wa TBA, Jasper B. Lugemarila, aliyemwakilisha Kaimu Mtendaji Mkuu wa TBA, wakati wa ziara ya Naibu Waziri wa Ujenzi, Uchukuzi na Mawasiliano anayesimamia Sekta ya Ujenzi, Mhe. Elias John Kwandikwa, alipofanya ziara ya kukagua Maendeleo ya Mradi wa Makazi wa Magomeni Kota, Aprili 13, 2019

Katika ziara hiyo, ilielezwa kuwa changamoto kubwa iliyosababisha kutokamilika kwa mradi huo kwa wakati ni mfumuko wa bei za malighafi ambazo kwa sasa zimepatiwa ufumbuzi kwa baadhi kuanza kuzalishwa na TBA wenyewe.

Mhandisi Lugemarila, alimhakikishia Mhe. Naibu Waziri kuwa wameshaandaa mpango kazi ambao utafuatwa kikamilifu ili waweze kukamilisha ujenzi huo kufikia mwishoni mwa mwaka huu.

Baada ya kukagua Maendeleo ya Ujenzi huo, Naibu Waziri Kwandikwa, alisisitiza kutoa ushirikiano kwa TBA ili waweze kukamilisha ujenzi wa Mradi huo kwa wakati kulingana na Mkakati huo mpya uliyoandaliwa.

Ujenzi wa nyumba za Magomeni Kota ukikamilika, utachangia kwa kiasi kikubwa kutatua changamoto ya makazi kwa familia 656, zikijumuisha familia 544 zilizokuwa zikiishi katika eneo hilo hapo awali.