?TBA YAPONGEZWA KWA UTEKELEZAJI WA MIRADI YA MAENDELEO MKOANI TABORA

Imewekwa: Thursday 09, April 2020

TBA YAPONGEZWA KWA UTEKELEZAJI WA MIRADI YA MAENDELEO MKOANI TABORA

Wakala wa Majengo Tanzania (TBA) wapongezwa kwa kuendelea kutekeleza miradi ya maendeleo Mkoani Tabora. Uongozi wa Mkoa wa Tabora ulitoa jukumu kwa TBA kusimamia na kujenga miradi ya maendeleo kwa ubora na viwango vinavyohitajika katika majengo mbalimbali mkoani humo.

Hatua ya kuipongeza TBA Mkoani Tabora imekuja baada ya Katibu Tawala Wilaya ya Kaliua Bw. Michael Nyahinga kujiridhisha na hatua ya utekelezaji wa miradi ya ujenzi wa nyumba za viongozi katika Wilaya ya Kaliua. Bw. Nyahinga alisema TBA imefanya kazi kubwa na nzuri ambayo inastahili pongezi kwani nyumba hizo zina ubora na zimejengwa kwa wakati ndani ya mkataba.

Kaimu Meneja wa TBA Mkoa wa Tabora Mhandisi Abraham Ndazi amesema TBA inatekeleza miradi ya aina tatu ambayo ni Ubunifu na Ujenzi, Ushauri pamoja na ukarabati. Miradi ya Ubunifu na Ujenzi inayotekelezwa Mkoani Tabora ni pamoja na ujenzi wa Nyumba ya makazi ya Katibu Tawala wa Tabora mjini, Nyumba ya makazi ya Mkuu wa Wilaya na Katibu Tawala Wilaya ya Kaliua pamoja na Nyumba za makazi za Maafisa Waandamizi Wilaya ya Kaliua. Pia katika miradi ya Ushauri inayotekelezwa ni pamoja na Ujenzi wa jengo la ofisi ya Halmashauri ya Wilaya ya Nzega, Ukarabati wa jengo la Ofisi ya Mkuu wa Mkoa wa Tabora na Ujenzi wa jengo la Utumishi wa Umma Mkoani Tabora.

Aidha, Mhandisi Abraham Ndazi alisema mafanikio ya utekelezaji wa miradi hiyo ya maendeleo Mkoani Tabora yanatokana na ushirikiano mzuri unaotolewa na washitiri kwa TBA. Vile vile Mhandisi Ndazi ameongeza kuwa ofisi yake ina mkakati wa kukarabati karakana kwa lengo la kuzalisha samani ambazo zitakuwa na ubora na kuongeza mapato kwa TBA.

Wakala wa Majengo Tanzania (TBA) ni taasisi ya Serikali iliyoanzishwa mwaka 2002 kwa lengo la kusimamia miliki za Serikali.