TBA YASHIRIKI UJENZI WA KITUO CHA PAMOJA CHA FORODHA KASUMULU

Imewekwa: Wednesday 25, March 2020

TBA YASHIRIKI UJENZI WA KITUO CHA PAMOJA CHA FORODHA KASUMULU

Wakala wa Majengo Tanzania (TBA) unashiriki kama Mshauri Elekezi Msaidizi (Sub-Consultant) katika utekelezaji wa mradi wa Ujenzi wa Kituo cha Pamoja cha Forodha mpakani mwa Tanzania na Malawi unaoendelea katika eneo la Kasumulu, Mkoani Mbeya. Mradi huu unatarajiwa kuwa na faida kubwa katika kukuza ushirikiano baina ya nchi hizi mbili pamoja na kuchochea fursa za kibiashara kati ya Tanzania na Malawi. Mradi huu utakapokamilika utarahisisha usafirishaji wa watu na mizigo kutoka pande zote mbili hivyo kuchochea ukuaji wa biashara pamoja na uchumi kwa ujumla.

Akielezea juu utekelezaji wa mradi huu, Arch. Daniel Mandari amesema utekelezaji wa mradi unaendelea vizuri kwa kuzingatia viwango vya ubora unaotakiwa. Pia amesema mradi huu ni muhimu kwa wananchi na taifa kwa ujumla kwa kuwa utakuza wigo wa bishara kati ya Tanzania na Malawi.

Arch. Mandari aliongeza kuwa katika mradi huu, TBA kama Mshauri Elekezi Msaidizi (Sub-Consultant) inashirikiana vizuri na kampuni ya CGC kutoka China ambayo ndiyo mkandarasi na kampuni ya EGC kutoka Misri ambayo ndiyo Mshauri Elekezi. Pia alieleza kuwa mradi huu unakabiliwa na changamoto ya mvua ambayo kwa kiasi fulani inaathiri kasi ya utekelezaji wa mradi kwa sababu kazi za ujenzi wa barabara zinaathirika sana na uwepo wa mvua zinazoendelea kunyesha nchini.

Kwa upande wa Meneja mradi kutoka kampuni ya CGC, Mhandisi Zhao amesema katika kutekeleza mradi huu huwa wanajadiliana na wataalam wa TBA kwa kila hatua ya utekelezaji wa mradi na wakikubaliana wanaendelea na kazi. Aliongeza kwa kusema kuwa wataalam wa TBA wana uzoefu mkubwa na kunapokuwa na mashaka na kitu wanapata nafasi ya kuwauliza na kupokea mapendekezo yanayowawezesha kufanya kazi nzuri na kwa viwango vinavyohitajika.

Imetolewa na Kitengo cha Mawasiliano kwa Umma na Masoko – TBA

25 Machi, 2020