Uzinduzi wa Mji wa Serikali Dodoma

Imewekwa: Monday 15, April 2019

Mji wa Serikali ambao ujenzi wake umesimamiwa na Wakala wa Majengo Tanzania (TBA), umezinduliwa rasmi Aprili 13, 2019 na Rais wa Jamhuri ya Muungano wa Tanzania, Mhe. Dkt. John Pombe Magufuli ambaye amepongeza Taasisi zilizoshiriki kufanikisha ujenzi huo.

Akitoa maelezo kwa Mhe. Rais kuhusu Mradi huo, Kaimu Mtendaji Mkuu wa TBA Daudi Kondolo, alisema Ujenzi wa Mradi huo hadi kukamilika kwake umezingatia ubora kwa kuweka Miundombinu yote inayostahili kwa ikiwemo pia ya watu wenye ulemavu.

Aidha Mtendaji Kondolo amebainisha kuwa Majengo yote yaliyojengwa katika Mji huo yako imara na yanakidhi viwango vinavyotakiwa.

Katika Mradi huo, TBA ilipewa jukumu la ubunifu wa majengo pamoja na kusimamia ujenzi huo kama Mshauri elekezi kwa kusimamia Wakandarasi wote walioshiriki ujenzi wa Mji huo.

Pamoja na kusimamia pia TBA imeshiriki kujenga Jengo la Ofisi ya Rais Utumishi na Utawala bora kama moja ya Wakandarasi, sehemu ambayo uzinduzi huo ulifanyika.

Mambo yaliyozingatiwa katika Ubunifu wa Majengo hayo ni pamoja na mahitaji ya Walemavu, matumizi makubwa ya mwanga asilia katika Jengo, muonekano wa kisasa wa Jengo, mahusiano baina ya Ofisi moja na nyingine, ukubwa wa nafasi, upepo asilia katika jengo, usalama wa Jengo na watumiaji kama uwepo wa Vizima Moto na Vifaa vya kutambua uwepo wa moto na Maegesho ya magari kwa Wakuu wa Wizara, Watumishi na Wageni