UONGOZI WA MKOA WA SONGWE WARIDHISHWA NA KASI YA UTEKELEZAJI WA MIRADI INAYOTEKELEZWA NA TBA

Imewekwa: Monday 23, March 2020

UONGOZI WA MKOA WA SONGWE WARIDHISHWA NA KASI YA UTEKELEZAJI WA MIRADI INAYOTEKELEZWA NA TBA

Uongozi wa Mkoa wa Songwe umeridhishwa na kasi ya utekelezaji wa miradi inayotekelezwa na TBA mkoani humo. Hayo yameelezwa na Katibu Tawala wa Mkoa wa Songwe Mhe. David Kafulila na Bi. Regina Bieda Mkurugenzi wa Halmashauri ya Mji wa Tunduma. Mhe. Kafulila ameitaja miradi hiyo kuwa ni ujenzi wa jengo la ofisi ya Mkuu wa Mkoa wa Songwe linalojengwa eneo la Mselewa Wilayani Mbozi, ujenzi wa jengo la Hospitali ya Wilaya ya Tunduma, pamoja na ujenzi wa jengo la ofisi ya Mkurugenzi Mtendaji Halmashauri ya Wilaya ya Songwe.

Mhe. Kafulila amesema kasi ya utekelezaji wa miradi hiyo ni kubwa kinyume na matarajio ya ofisi yake na amethibitisha kuwa TBA inafanya kazi nzuri sana mkoani Songwe achilia mbali changamoto kadhaa zilizojitokeza hasa suala la fedha kutoka katika ofisi yake ya Mkoa.

Vile vile Mhe. Kafulila amepongeza jitihada na ushirikiano mkubwa unaotolewa na TBA mkoani Songwe katika kusukuma kasi ya utekekelezaji wa miradi ya maendeleo inayotekelezwa katika Mkoa huo.

Aidha, Mkurugenzi Mtendaji wa Halmashauri ya Mji wa Tunduma Bi. Regina Bieda amesema anatambua jitihada zinazoendelea kufanywa na TBA Mkoa wa Songwe kuwa zimezaa matunda hasa katika kuharakisha utekelezaji wa miradi hiyo mikubwa ya maendeleo. Pia, amepongeza utendaji mzuri na ushirikiano mkubwa wa TBA Mkoa wa Songwe na kuonesha nia ya kuendelea kufanya kazi na Wakala wa Majengo Tanzania (TBA).

Naye Kaimu Meneja wa TBA Mkoa wa Songwe Arch. Steven Simba amesema, ofisi yake inajukumu kubwa la kuendelea kutekeleza kwa wakati miradi yote iliyochini ya TBA katika Mkoa wa Songwe kwa kuzingatia ubora, muda wa mkataba na gharama nafuu